على إبراهيم يكتب : على مواجعى طبطبى
الثلاثاء 17 يناير 2017 12:17:31 مساءًمشاهدات(107)
طب جربي
علي مواجعي تطبطي 
وتكلميني بصوت حنين 
مش حزين 
وتصبريني علي السنين
وتقربي 
وبلاش اذا مال الزمان
معاه تميلي وتضربي
ومترمنيش في الدوامات
انا رغم كل العمر دا 
عيل غبي 
بتهزني اﻻحزان قوام
وبخاف من الكوابيس قوي
كل اما انام
حتي ان قريت نص الكتاب
ومهما صليت ع النبي 
ابليسي ساكن في النافوخ 
بس اما تبقي معاي يدوخ 
يابنت قلبي متهربيش
زي الصاروخ
خليكي حارس ملعبي 
يمكن في لحظة يشق قلبي 
طوفان ايمان
وانسي اللي كان
ويحبني ربي قوي 
سبحانه جل علاه قوي
وانا منطوي معرفش 
غيرك مذهبي