عوذيني من حراب الناس يابنتي
بخري النظرة في عيوني
كل ناحية وكل سنتي
عوذيني من مواجع قاطمه نصي
من مراجع مالية نصي
عوذيني من عيونك
بعد ما في عيني تبصي
من قصايدي ومن كلامي
من حبايبي وم الحرامي
المهندس والمحامي
الوصولي والعصامي
حتي من شيخي وامامي
كان امامي وبرضه لصي
اقري وردك فوق سريري
وانفخي بوردك في كيري
خمسي لي علي المخدة
تحت ضهري عند رجلي
فوق دماغي واحده واحدة
خمسي وبلاش مناهدة
في وش انا وفي وش غيري
خمسي حتي في ضميري
اخزقي لي عين زياد
ايوة اخوك وابن عمك
وابن خالك والجيران
حتي باسل وام باسل وابراهيم
عوذيني من علي عبده، ممدوح، فر غلي
حتي من عين ام متي
ايوة دي ..ام ضحكة فالتة
اقري عدية يس
خزقي لي عنين شيرين
بالمعوذتين وطه
واوعي تنسي تبدأي
او تختمي بالكرسي
اطلقي بخورك في روحي
كمكمي بنورك جروحي
طلعي المكبوت وبوحي
ريحيني واستريحي
عوذيني من عنيكي الطيبين
من بعاد وقريبين
م اللي بيكيوا كتير علينا
واللي ضحكوا بنص عين
خمسي بايدك في وشي
وفي عيون الناس ورشي
كل ملح بكل قوة
هي موتة .. ولا رقوة
واقري سورة الفاتحة لزما
وانت ماسكة في طرف نعشي
