على القماش يكتب عن : التصريح بسرقة 33 الف قطعة اثار

لان تصريح وزير الاثار واعلانه عن سرقة 33 ألف قطعة بدأ يعمل رد فعل فى مصر وبره مصر  .. كان لازم يعملوا مطب صناعى

فيقوم الامين العام للمجلس الاعلى للاثار و يعلن ان ال 33 ألف قطعة مسروقة ، اتسرقوا من زمان قبل القانون 117 الصادر سنة 1983 والذى يمنع بيع الاثار

طيب..

يعنى من عام 1983 لحد النهارده مسك اكتر من عشر رؤساء هيئة وامين عام ووزراء اثار من احمد قدرى وعبد الرؤوف على يوسف وسيد توفيق وابراهيم بكر وعبد الحليم نور الدين وعلى حسن وجاب الله على وزاهى حواس ومحمد عبد امقصود واحمد عبدالفتاح ومحسن سيد على و عادل عبد الستار و ومصطفى امين و محمد ابراهيم و احمد عيسى وممدوح الدماطى واخيرا خالد العنانى  وغيرهم وغيرهم ولا واحد خد باله من سرقة العدد ده وفجاه اكتشفه العنانى وزير الاثار !!

طيب اللى كان عنده قطع اثار تم عمل له اقرار حيازه حسب تصريحات الامين العام .. طيب ما اقرار الحيازه فيه تسجيل للقطع فى سجلات الاثار الرسمية ويتم المرور عليه فى اى وقت ، يعنى الاثار عنده اشبه بعهده المخازن !

صحيح فيه اثار من دى اتسرقت فى قضية ابو شنب الشهيرة ، لكن للحقيقة ان اللى عندهم اثار حفيوا عشان يسلموا للهيئة وما حدش سأل فيهم فتم استبدالها باثار مقلده وهربوا الاثار الاصلية

الامين العام للمجلس الاعلى للاثار بيقول لم تسرق قطعة واحدة من عام 2015 .. طيب بتاع الشارقة رجع اثار كانت مسروقة فى اى وقت ؟!

طيب عينى فى عينك كده .. ولا قطعة اثار واحدة اتسرقت من سنة 2015 .. طيب يا اخى روح شارع المعز واسأل .. ولا اقرا صفحات الحوادث !

متنسوش تسجلوا المطب الصناعى فى سجلات الاثار