الرئيس السيسي يرد على الشائعات المسيئة للرئاسة والقوات المسلحة خلال الأيام الماضية

قال الرئيس عبدالفتاح السيسي، إن الشائعات المسيئة للرئاسة والقوات المسلحة والتي ترددت خلال الأيام الماضية، ليس لها أي أساس من الصحة، وذلك خلال جلسة "اسأل الرئيس" بختام مؤتمر الشباب الثامن، اليوم السبت.   وتابع الرئيس السيسي: "توقفوا أمام الـ10 أيام اللي فاتوا، انتوا اللي كنتوا بتشيروا الكلام.. ده مش عتاب"، مضيفًا ضاحكًا: "أنا بقى باخد حقي دلوقتي".   وأضاف: "اللي يقف في 3 يوليو ويقدم نفسه والجيش وأولاده وأحفاده تعملوا فيه كدا، ابن مصر، انتوا اللي توزعوا (تشيروا)؟".   ورد المشاركون في الجلسة بالنفي، قبل أن يقاطعهم الرئيس السيسي: "سيبوني بقى، بقول أخد حقي، انا قصدت بالكلمة دي، مصر مش انا".   وواصل: "خايفين من التنظيمات ليكوا حق، الإرهاب ليكوا حق، الدول تدخل في بلدكم، ليكم كل الحق، بس أنتم صمام الأمان لمصر وشعبها.. محدش يلخبطكوا، يجي اليوم اللي حد يقول فيه فواتير بأكلي وشربي، أنا قولت علشان خاطركم، بس معقول يجي اليوم ده.. يهمني إنكم تفضلوا ثابتين". وعن الإشاعات التي ظهرت خلال الأيام الماضية بشأن إرجاء دفن والدته لحين الانتهاء من افتتاح قناة السويس رغم وفاتها قبلها ببضعة أيام، علق الرئيس السيسي قائلًا: "لما يتقال إن حالة وفاة كانت موجودة في أحداث القناة ويتقال اتأجلت 3 أو 4 أيام لغاية لما نفتتح القناة، بقى الراجل ده يعمل في أهل بيته كده، نصدقه تاني؟".   وأضاف الرئيس، خلال كلمته بالمؤتمر الوطني الثامن للشباب، أمس السبت: "الناس بتسأل الراجل ده عمل المدفن ده، آه صحيح، طيب على حساب مين؟ الكلام ده بقول الأجهزة قالت نبوس إيدك متقولوش.. لا والله لازم أريح كل مصري، والله هذا كذب وافتراء.. مكنش مفروض نتكلم في النقطة دي".   وتابع الرئيس السيسي : "كل الأجهزة قالولي لو سمحت متتكلمش، كادوا يبوسوا إيدي.. والنبي ما تعمل كده، قولتلهم اللي بيني وبين الناس هي الثقة، هما مصدقيني، أنا لو سكت عنها ده أخطر حاجة في الدنيا، كل ست ىكبيرة في السن بتدعيلي في البيت أسيبها إزاي محتارة تقول إيه الحكاية بتاعتك أنت إيه، أنت كده ولا كده، فعلًا الحاجات اللي اتقالت دي انت عملهتا ولا معملتهاش".   وانطلقت صباح اليوم السبت، فعاليات المؤتمر الوطني للشباب في نسخته الثامنة والمنعقد بمركز المنارة للمؤتمرات بالقاهرة الجديدة، بمشاركة الرئيس عبد الفتاح السيسي.   وحضر فعاليات المؤتمر رئيس الوزراء الدكتور مصطفى مدبولي ورئيس مجلس النواب الدكتور على عبدالعال وعدد من الوزراء وكبار رجال الدولة، فضلا عن مشاركة 1600 شاب من مختلف القطاعات في الدولة.